U37 Bømlo var denne veka invitert til Wärtsilä Norway sitt kontor på Heiane. 21 unge representantar i det lokale næringslivet møtte opp for ein sosial kveld med fleire faglege innslag. Her fekk dei møte eit framoverlent selskap, og nokre av deira gode samarbeidspartnarar i regionen.

Administrerande direktør i Wärtsilä Norway AS, Hans Petter Nesse, tok i mot forsamlinga og fortalde litt om Wärtsilä, historia om oppstarten på Rubbestadneset i 1903, oppkjøpet i 1986 og strategi for vegen vidare. Egil Hystad fortalde deretter om grøn ammoniakk, og kvifor dei no testar ut dette som drivstoff.

Kjell Arve Vatle frå Alltec tok gruppa med på ein omvisning på det nasjonale katapultsenteret Sustainable Energy. Kjell Arve og Egil fortalde engasjert om korleis dei driv forskning og innovativ testing, og om fleire firma som no er inne og testar sine produkt i katapulten. Ved endt omvisning fekk gruppa høyre frå dagleg leiar Willie Wågen i Sustainable Energy, om alt dei har fått til ved katapulten på få år, og planane vidare.

U37 hadde i forkant ytra ønske om å høyre noko om korleis unge kan gjere seg meir attraktive for styreverv i profesjonelle styrer i regionen, og Astrid Kjellevold tok turen frå Atheno for å fortelje om akkurat dette. Ho kom med nyttige tips til korleis ein kan sikre seg eit verv, og gode ting å huske på dersom ein blir vald inn i eit styre.

Ved sida av det faglege innhaldet fløyt praten og maten lett blant dei oppmøtte. Styringsgruppa i Bømlo U37 er utruleg takksame for at Wärtsilä Norway og Sustainable Energy inviterte oss over til Heiane, og for alle som delte av si tid og kunnskap med oss frå Bømlo U37. Me håpar de hadde ein fin kveld saman med oss.

Ønskjer di bedrift å invitere Bømlo U37 på noko liknande? Ta kontakt med mari@bomlonr.no!